Një tragjedi ajrore në Indi, ku humbën jetën 241 persona, ka një të mbijetuar të vetëm – Vishwash Kumar Ramesh. Ai ndodhej në rreshtin e parë të klasit ekonomik, në vendin pranë dritares me numër “11-A”, kur avioni Boeing 787 Dreamliner u rrëzua mbi një zonë të banuar në qytetin Ahmedabad.
Ramesh, 40 vjeç, arriti të largohej vetë nga rrënojat e avionit, i plagosur por në jetë. Të gjithë pasagjerët e tjerë fatkeqësisht humbën jetën. Një video virale në rrjetet sociale e tregon atë me fytyrën e përgjakur, duke vrapuar i tronditur pranë vendit të aksidentit, ndërsa njerëzit përreth e shikonin me mosbesim.
Një punonjës i ndihmës së shpejtë konfirmoi për agjencinë AP se Ramesh u dërgua me ambulancë për ndihmë mjekësore. Sipas mjekëve, ai kishte dëmtime të shumta në trup, por jeta e tij nuk ishte në rrezik.
Deklarata e vetë të mbijetuarit është tronditëse:
“Tridhjetë sekonda pas ngritjes, dëgjuam një zhurmë të fortë. Ndjeva sikur avioni ngeci në ajër. Dritat brenda u dridhën, jeshile dhe të bardha. Papritur, ndodhi përplasja. Kishte trupa përreth meje. U hodha dhe ika”, tregoi Ramesh.
Ai shton se pjesa e avionit ku ndodhej ai nuk goditi çatinë e një ndërtese, por ra në tokë, gjë që mund të ketë shpëtuar jetën e tij. “Pashë daljen dhe mendova se mund të dilja. U përpoqa dhe ia dola,” deklaron ai.
Gazeta britanike “The Guardian” dhe media të tjera ndërkombëtare e kanë cilësuar mbijetesën e Rameshit si “një mrekulli të vërtetë”. Në rrjetet sociale, rasti i tij po përshkruhet si ndërhyrje hyjnore, fat unik dhe një dëshmi e rrallë e shpëtimit nga vdekja.
Bileta e tij prej letre, me shenjën “11-A”, i ka mbijetuar aksidentit dhe është publikuar në disa portale ndërkombëtare si simbol i fatit të jashtëzakonshëm të këtij njeriu.